ସହରର ଚାକଚକ୍ୟଠାରୁ ଆରମ୍ଭ କରି ଗାଁର ଶାନ୍ତ ପରିବେଶ ପର୍ଯ୍ୟନ୍ତ, ସବୁଠି ନାରୀଟିଏ ଆଜି ଭୟ ଓ ଆଶଙ୍କାରେ ବଞ୍ଚିବାକୁ ବାଧ୍ୟ । ଆଇନର ଶାସନ ଥିବା ଏକ ଗଣତାନ୍ତ୍ରିକ ଦେଶରେ ନାରୀର ସୁରକ୍ଷା ଆଜି ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି! ଘରୁ ଗୋଡ଼ କାଢ଼ିଲେ ଅସୁରକ୍ଷିତ, ଘରେ ରହିଲେ ବି ନିର୍ଯାତିତ । ଏହା ହେଉଛି ଆଜିର ସମାଜରେ ନାରୀର କଠୋର ବାସ୍ତବତା । ଦିନକୁ ଦିନ ରାଜ୍ୟରେ ନାରୀଙ୍କ ପ୍ରତି ବଢିଚାଲିଥିବା ଅସଦାଚରଣ, ଦୁଷ୍କର୍ମ ଏବଂ ହିଂସା ଭଳି ଜଘନ୍ୟ ଅପରାଧ ସଭ୍ୟ ସମାଜର ମେରୁଦଣ୍ଡକୁ ଦୋହଲାଇ ଦେଇଛି । ସହରର ଚାକଚକ୍ୟଠାରୁ ଆରମ୍ଭ କରି ଗାଁର ଶାନ୍ତ ପରିବେଶ ପର୍ଯ୍ୟନ୍ତ, ସବୁଠି ନାରୀଟିଏ ଆଜି ଭୟ ଓ ଆଶଙ୍କାରେ ବଞ୍ଚିବାକୁ ବାଧ୍ୟ । ଆଇନର ଶାସନ ଥିବା ଏକ ଗଣତାନ୍ତ୍ରିକ ଦେଶରେ ନାରୀର ସୁରକ୍ଷା ଆଜି ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି । ପ୍ରଶ୍ନ ଉଠୁଛି, ଆଉ କେତେ ଦିନ ନାରୀ ଏହିପରି ଭୟର ପରିଧି ଭିତରେ ନିଜ ଜୀବନ କାଟିବ ?ନ୍ୟାସନାଲ କ୍ରାଇମ ରେକର୍ଡସ ବ୍ୟୁରୋ (NCRB)ର ସଦ୍ୟତମ ରିପୋର୍ଟ ଓଡ଼ିଶାର ଏକ ଭୟାବହ ସୂଚନା ଦେଉଛି । ରିପୋର୍ଟ ଅନୁସାରେ, ମହିଳାଙ୍କ ବିରୋଧରେ ହେଉଥିବା ଅପରାଧ ହାରରେ ଓଡ଼ିଶା ଦେଶର ଶୀର୍ଷ ରାଜ୍ୟମାନଙ୍କ ମଧ୍ୟରେ ରହିଛି । ପ୍ରତିଦିନ ନାବାଳିକାଙ୍କୁ ଦୁଷ୍କର୍ମ, ଛାତ୍ରୀଙ୍କୁ ଅସଦାଚରଣ, ଯୌତୁକ ପାଇଁ ନିର୍ଯାତନା , ଏସିଡ୍ ମାଡ଼ ଏବଂ ହତ୍ୟା ଭଳି ଲୋମହର୍ଷଣକାରୀ ଖବର ସାମ୍ନାକୁ ଆସୁଛି । ଏହି ଘଟଣାଗୁଡ଼ିକ କେବଳ କିଛି ସମୟ ପାଇଁ ଆଲୋଡ଼ନ ସୃଷ୍ଟି କରୁଛି, କିନ୍ତୁ ଏହାର ସ୍ଥାୟୀ ସମାଧାନର ବାଟ ଫିଟୁନାହିଁ ।ସମାଜବିଜ୍ଞାନୀ ମତରେ, ଏହି ସାମାଜିକ ବ୍ୟାଧି ପଛରେ ଅନେକ କାରଣ ଅଛି । ପୁରୁଷତାନ୍ତ୍ରିକ ମାନସିକତା, ଆଇନ ପ୍ରତି ଭୟ ନଥିବା, ବିଚାର ବ୍ୟବସ୍ଥାର ଧିମା ଗତି, ନିଶା ସେବନର ବହୁଳତା ଏବଂ ସାମାଜିକ ଓ ନୈତିକ ମୂଲ୍ୟବୋଧର ଅବକ୍ଷୟ ଏହାର ମୁଖ୍ୟ କାରଣ । ଅନେକ କ୍ଷେତ୍ରରେ, ପୀଡ଼ିତା ଲୋକଲଜ୍ଜା ଏବଂ ସାମାଜିକ ବାସନ୍ଦ ଭୟରେ ଚୁପ୍ ରହିଯାଉଛି, ଯାହା ଅପରାଧୀଙ୍କୁ ଆହୁରି ନିର୍ଭୟ କରିଦେଉଛି । ପ୍ରାଶାସନିକ ସ୍ତରରେ ଉଦାସୀନତା ଏବଂ ରାଜନୈତିକ ଇଚ୍ଛାଶକ୍ତିର ଅଭାବ ମଧ୍ୟ ଏହି ସମସ୍ୟାକୁ ଜଟିଳ କରିଛି ।କେବଳ କଠୋର ଆଇନ ପ୍ରଣୟନ କରିଦେଲେ ଏହି ସମସ୍ୟାର ମୂଳୋତ୍ପାଟନ ସମ୍ଭବ ନୁହେଁ । ଏଥିପାଇଁ ଆବଶ୍ୟକ ଏକ ସାମୂହିକ ସାମାଜିକ ଆନ୍ଦୋଳନ । ପରିବାର ସ୍ତରରୁ ପିଲାମାନଙ୍କୁ ନାରୀଙ୍କୁ ସମ୍ମାନ ଦେବାର ଶିକ୍ଷା ଦେବାକୁ ପଡ଼ିବ । ସ୍କୁଲ ଓ କଲେଜରେ ନୈତିକ ଶିକ୍ଷାକୁ ଗୁରୁତ୍ୱ ଦେବା ସହ ଯୁବପିଢ଼ିଙ୍କ ମଧ୍ୟରେ ସଚେତନତା ସୃଷ୍ଟି କରିବାକୁ ହେବ । ସରକାର ଓ ପ୍ରଶାସନକୁ ମଧ୍ୟ ଅଧିକ ସକ୍ରିୟ ହୋଇ ଅପରାଧୀଙ୍କୁ ଦୃଷ୍ଟାନ୍ତମୂଳକ ଦଣ୍ଡ ଦେବା ସହ ପୀଡ଼ିତାଙ୍କୁ ତ୍ୱରିତ ନ୍ୟାୟ ଓ ସୁରକ୍ଷା ଯୋଗାଇ ଦେବା ଜରୁରୀ । ଯେପର୍ଯ୍ୟନ୍ତ ସମାଜର ପ୍ରତ୍ୟେକ ବ୍ୟକ୍ତି ନାରୀକୁ ଏକ ବସ୍ତୁ ନୁହେଁ ବରଂ ଜଣେ ସମ୍ମାନର ପାତ୍ର ଭାବରେ ଗ୍ରହଣ ନ କରିଛି, ସେ ପର୍ଯ୍ୟନ୍ତ ଏକ ସୁରକ୍ଷିତ ଓ ଭୟମୁକ୍ତ ସମାଜର ପରିକଳ୍ପନା ଅସମ୍ଭବ !