ଜେଲ ଯିବେ ପିଟିଆଇ ସାଂସଦଙ୍କ ସମେତ ୧୬୬ ସଦସ୍ୟ :
ଇସ୍ଲାମାବାଦ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଏକ ବଡ଼ ଝଟକା ଲାଗିଛି । ଏକ କୋର୍ଟ ଗୁରୁବାର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଦଳର କିଛି ସାଂସଦଙ୍କ ସମେତ ୧୬୬ ଜଣ ସଦସ୍ୟଙ୍କୁ ୧୦ ବର୍ଷ ଲେଖାଏଁ ଜେଲଦଣ୍ଡ ଶୁଣାଇଛନ୍ତି । ସେମାନଙ୍କ ବିରୋଧରେ ୯ ମେ’, ୨୦୨୩ରେ ପଞ୍ଜାବ ପ୍ରଦେଶରେ ଆଇଏସଆଇ କୋଠା ଏବଂ ଅନ୍ୟାନ୍ୟ ସାମରିକ ପ୍ରତିଷ୍ଠାନ ଉପରେ ଆକ୍ରମଣ ମାମଲା ରହିଛି । ଇମ୍ରାନ ଖାନଙ୍କ ପାକିସ୍ତାନ ତେହେରିକ୍-ଏ-ଇନସାଫ (ପିଟିଆଇ) ନେତାମାନଙ୍କୁ ଦଣ୍ଡ ଦିଆଯିବାର ଖବର, ଅଗଷ୍ଟ ୫ରୁ ସାରା ଦେଶରେ ପ୍ରସ୍ତାବିତ ‘ମୁକ୍ତ ଇମ୍ରାନ ଖାନ ଆନ୍ଦୋଳନ’ ଆରମ୍ଭ ହେବାର ମାତ୍ର ଗୋଟିଏ ସପ୍ତାହ ପୂର୍ବରୁ ଆସିଛି ।
ପାକିସ୍ତାନ ତେହେରିକ୍-ଏ-ଇନସାଫ୍ ଫୈସଲାବାଦ ଆତଙ୍କବାଦ ନିରୋଧୀ କୋର୍ଟ (ATC)ର ନିଷ୍ପତ୍ତିକୁ କଡ଼ା ନିନ୍ଦା କରିଛି । ଇମ୍ରାନ ଖାନଙ୍କ ଦଳ ଏହି ରାୟକୁ ସାଂସଦମାନଙ୍କୁ ସଂସଦରୁ ଅଯୋଗ୍ୟ ଘୋଷଣା କରିବା ଏବଂ ଦଳକୁ ଶାନ୍ତିପୂର୍ଣ୍ଣ ପ୍ରତିବାଦ କରିବାରୁ ରୋକିବା ପାଇଁ ଏକ ଷଡ଼ଯନ୍ତ୍ରର ଅଂଶ ବୋଲି କହିଛି । କୋର୍ଟ ନ୍ୟାସନାଲ ଆସେମ୍ବଲିର ବିରୋଧୀ ଦଳ ନେତା ଓମାର ଆୟୁବ, ସିନେଟରେ ବିରୋଧୀ ଦଳ ନେତା ଶିବଲି ଫରାଜ, ପିଟିଆଇର ପ୍ରମୁଖ ନେତା ଜର୍ତାଜ ଗୁଲ ଏବଂ ସାହିବଜାଦା ହମିଦ ରଜାଙ୍କୁ ପ୍ରତ୍ୟେକଙ୍କୁ ୧୦ ବର୍ଷ ଜେଲଦଣ୍ଡରେ ଦଣ୍ଡିତ କରିଛନ୍ତି ।
ଫୈସଲାବାଦର ଆଇଏସଆଇ କୋଠା ଉପରେ ଆକ୍ରମଣ ମାମଲାରେ କୋର୍ଟ ଗୁରୁବାର ୧୮୫ ଅଭିଯୁକ୍ତଙ୍କ ମଧ୍ୟରୁ ୧୦୮ ଜଣଙ୍କୁ ଦୋଷୀ ସାବ୍ୟସ୍ତ କରିଛନ୍ତି ଏବଂ ବାକି ୭୭ ଜଣଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି । ଫୈସଲାବାଦର ଏକ ପୁଲିସ ଷ୍ଟେସନ ଉପରେ ଆକ୍ରମଣ ସହ ଜଡିତ ମାମଲାରେ ୫୮ ଅଭିଯୁକ୍ତଙ୍କୁ ୧୦ ବର୍ଷ ଲେଖାଏଁ କାରାଦଣ୍ଡରେ ଦଣ୍ଡିତ କରାଯାଇଛି। ଦୋଷୀମାନଙ୍କ ମଧ୍ୟରେ ନ୍ୟାସନାଲ ଆସେମ୍ବଲିର ୬ ଜଣ ସଦସ୍ୟ, ପଞ୍ଜାବ ବିଧାନସଭାର ଜଣେ ସଦସ୍ୟ ଏବଂ ଜଣେ ସାଂସଦ ଅନ୍ତର୍ଭୁକ୍ତ । ମେ’ ୯ ମାମଲାରେ ଏପର୍ଯ୍ୟନ୍ତ ଇମ୍ରାନ ଖାନଙ୍କ ଦଳର ୧୪ ଜଣ ସାଂସଦଙ୍କୁ ଦୋଷୀ ସାବ୍ୟସ୍ତ କରାଯାଇ ପଦରୁ ଅଯୋଗ୍ୟ ଘୋଷଣା କରାଯାଇଛି ।
ଦଳର ମଧ୍ୟବର୍ତ୍ତୀକାଳୀନ ଅଧ୍ୟକ୍ଷ ଗୌହର ଅଲି କହିଛନ୍ତି ଯେ, ପାକିସ୍ତାନ ତେହେରିକ୍-ଏ-ଇନସାଫ୍ ଏହି ନିଷ୍ପତ୍ତିକୁ ଲାହୋର ହାଇକୋର୍ଟରେ ଚ୍ୟାଲେଞ୍ଜ କରିବ। ସେପଟେ ଇମ୍ରାନ ଖାନ ସେନା ମୁଖ୍ୟ ଅସୀମ ମୁନିରଙ୍କୁ ଟାର୍ଗେଟ କରିଛନ୍ତି । ସେ କହିଛନ୍ତି ଯେ, ଜେନେରାଲ ସେନାକୁ ଅପମାନିତ କରୁଛନ୍ତି ଏବଂ କ୍ଷମତା ଉପରେ ନିଜର ଦଖଲ ବଜାୟ ରଖିବା ପାଇଁ ଜାତୀୟ ସ୍ୱାର୍ଥକୁ ବଳିଦାନ ଦେଉଛନ୍ତି । ସୋସିଆଲ ମିଡିଆରେ ଏକ ପୋଷ୍ଟରେ କହିଥିଲେ, ‘ଦେଶ ମୁନିରଙ୍କ ଆଇନ ଅନୁସାରେ ଚାଲିଛି ଏବଂ ISI ତାଙ୍କୁ ସୁରକ୍ଷା ଦେଉଛି। ସେ କ୍ଷମତା ଉପରେ ନିଜର ଦଖଲ ବଜାୟ ରଖିବା ପାଇଁ ଜାତୀୟ ସ୍ୱାର୍ଥକୁ ବଳି ଦେବାକୁ ପ୍ରସ୍ତୁତ!