ICICI ବ୍ୟାଙ୍କର ପୂର୍ବତନ ସିଇଓ ଚନ୍ଦା କୋଚର୍‌ ଦୋଷୀ ସାବ୍ୟସ୍ତ | ୬୪ କୋଟି ଟଙ୍କା ଲାଞ୍ଚ ନେବାର ହୋଇଥିଲା ଅଭିଯୋଗ
ନୂଆଦିଲ୍ଲୀ: ICICI ବ୍ୟାଙ୍କର ପୂର୍ବତନ ସିଇଓ ଚନ୍ଦା କୋଚର ଦୋଷୀ ସାବ୍ୟସ୍ତ। ଭିଡିଓକନ୍ କମ୍ପାନୀକୁ ୩୦୦ କୋଟି ଟଙ୍କାର ଋଣ ପ୍ରଦାନ କରିବା ପାଇଁ ତାଙ୍କ ଉପରେ ୬୪ କୋଟି ଟଙ୍କା ଲାଞ୍ଚ ନେବାର ଅଭିଯୋଗ ଥିଲା। ଏଥିରେ ତାଙ୍କୁ ଦୋଷୀ ସାବ୍ୟସ୍ତ କରିଛନ୍ତି ଆପିଲେଟ୍ ଟ୍ରିବ୍ୟୁନାଲ୍। ରିପୋର୍ଟ ଅନୁଯାୟୀ, ୩ ଜୁଲାଇରେ ଦିଆଯାଇଥିବା ଆଦେଶରେ, ଟ୍ରିବ୍ୟୁନାଲ୍ କହିଛନ୍ତି ଯେ ଏହି ଟଙ୍କା ଚନ୍ଦାଙ୍କ ସ୍ୱାମୀ ଦୀପକ କୋଚରଙ୍କ ମାଧ୍ୟମରେ ଭିଡିଓକନ୍ ସହିତ ଜଡିତ ଏକ କମ୍ପାନୀ ମାଧ୍ୟମରେ ଦିଆଯାଇଥିଲା। ଏହାକୁ ‘କ୍ୱିଡ୍ ପ୍ରୋ କୋ’ (କିଛି ବଦଳରେ କିଛି)ର ସ୍ପଷ୍ଟ ମାମଲା ଭାବରେ ଉଲ୍ଲେଖ କରାଯାଇଥିଲା।ଇଡି ଦାବି କରିଛି ଯେ ଚନ୍ଦା କୋଚର ଆଇସିଆଇସିଆଇ ବ୍ୟାଙ୍କର ଆଭ୍ୟନ୍ତରୀଣ ନୀତି ଉଲ୍ଲଂଘନ କରି ଏହି ଋଣ ଦେଇଛନ୍ତି। ଟ୍ରିବ୍ୟୁନାଲ୍ ଇଡିର ଦାବିକୁ ସମର୍ଥନ କରିଛି। କହିଛି ଯେ ଚନ୍ଦା ଭିଡିଓକନ୍ ସହିତ ତାଙ୍କ ସ୍ୱାମୀଙ୍କ ବ୍ୟବସାୟିକ ଲିଙ୍କକୁ ଲୁଚାଇଛନ୍ତି। ଯାହା ବ୍ୟାଙ୍କର ସ୍ୱାର୍ଥ ନିୟମ ବିରୁଦ୍ଧରେ ଥିଲା।ଟ୍ରିବ୍ୟୁନାଲ୍ ଅନୁଯାୟୀ, ଆଇସିଆଇସିଆଇ ବ୍ୟାଙ୍କ ଭିଡିଓକନକୁ 300 କୋଟି ଟଙ୍କା ଋଣ ଦେବା ମାତ୍ରେ, ପରଦିନ ୬୪ କୋଟି ଟଙ୍କା ଭିଡିଓକନର କମ୍ପାନୀ SEPL ରୁ NRPLକୁ ଟ୍ରାନ୍ସଫର ହୋଇଥିଲା। କାଗଜପତ୍ରରେ NRPLର ମାଲିକଙ୍କୁ ଭିଡିଓକନର ଅଧ୍ୟକ୍ଷ ଭେଣୁଗୋପାଳ ଧୂତ ଦର୍ଶାଯାଇଥିଲା, କିନ୍ତୁ ବାସ୍ତବରେ ଏହା ଦୀପକ କୋଚରଙ୍କ ଦ୍ୱାରା ନିୟନ୍ତ୍ରିତ ଥିଲା, ଯିଏ ଏହାର ପରିଚାଳନା ନିର୍ଦ୍ଦେଶକ ମଧ୍ୟ ଥିଲେ। ଟ୍ରିବ୍ୟୁନାଲ୍ ଏହାକୁ ଲାଞ୍ଚର ଏକ ସିଧାସଳଖ ପ୍ରମାଣ ଭାବରେ ବିବେଚନା କରିଥିଲା।ଟ୍ରିବ୍ୟୁନାଲ୍ 2020 ମସିହାରେ ଏକ କର୍ତ୍ତୃପକ୍ଷଙ୍କ ନିଷ୍ପତ୍ତିକୁ ମଧ୍ୟ ଭୁଲ ବୋଲି କହିଛନ୍ତି। ଯେଉଁଥିରେ ଚନ୍ଦା ଏବଂ ତାଙ୍କ ସହଯୋଗୀଙ୍କ 78 କୋଟି ଟଙ୍କାର ସମ୍ପତ୍ତି ମୁକ୍ତ କରାଯାଇଥିଲା। ଟ୍ରିବ୍ୟୁନାଲ୍ କହିଛନ୍ତି ଯେ କର୍ତ୍ତୃପକ୍ଷ ଆବଶ୍ୟକ ପ୍ରମାଣକୁ ଅଣଦେଖା କରିଛନ୍ତି ଏବଂ ଭୁଲ ନିଷ୍କର୍ଷ ବାହାର କରିଛନ୍ତି। ଦୃଢ଼ ପ୍ରମାଣ ଏବଂ ଘଟଣାଗୁଡ଼ିକର ସ୍ପଷ୍ଟ ସମୟସୀମା ଆଧାରରେ ED ସମ୍ପତ୍ତିକୁ ଆଟାଚ୍ କରିଛି।ଟ୍ରିବ୍ୟୁନାଲ୍ କହିଛନ୍ତି ଯେ ଋଣ ପ୍ରଦାନ, ଟଙ୍କା ଟ୍ରାନ୍ସଫର ଏବଂ ଦୀପକ କୋଚରଙ୍କ କମ୍ପାନୀକୁ ପାଣ୍ଠି ପଠାଇବା ଏସବୁ ଚନ୍ଦା କୋଚରଙ୍କ ଦ୍ୱାରା କ୍ଷମତାର ଅପବ୍ୟବହାର ଏବଂ ନୀତିର ଉଲ୍ଲଂଘନକୁ ଦର୍ଶାଉଛି।